bapu Icon
Title Picture

'పరిపూర్ణత' - అదెలా ఉంటుంది? దాన్నెలా నిర్వచించాలి? దాన్నెవరైనా సాధించారా? అసలది సాధ్యమా? అది అగమ్యం. ఎప్పుడూ అల్లంత దూరాన కనిపించే మురిపించే అందం. అది అందదు-కాని, దానికి అతి సమీపంగా వెళ్ళిన మహానుభావులున్నారు. వారిలో బాపుగారు ఒకరు. సృజనాత్మక ప్రతిభలో, రేఖా సౌందర్య సాధనలో 'పరిపూర్ణత' దిశగా ఆయన వెళ్ళినంత దూరం మరెవరూ వెళ్ళలేదనిపిస్తుంది. చివరికి ఆయనే అగమ్యుడైపోయాడు. చిత్రకారులందరికీ ఆయన గీత భగవద్గీత అయింది.

Title Picture

ప్రఖ్యాత చిత్రకారుడు శ్రీ బాపు కార్టూన్ల సంకలనం 'కొంటె బొమ్మల బాపు' గీత పని వారందరికీ - ముఖ్యంగా బాపిస్టులందరికీ-శిరోధార్యమైన కార్టూన్నిధి. కొంటెతనం, తుంటరితనం, హాస్యం అపహాస్యం, పెన్ ప్రిక్స్, పన్ ట్రిక్స్, చురకలు, చెణుకుల కలబోతగా బాపు గీసిన కార్టూన్లు పాత కొత్తల మేలుకలయికగా ఇందులో ఏర్చికూర్చారు. పీఠికతో కలిపి 120 పేజీలున్న ఈ పుస్తకం (ప్రచురణ నవోదయ పబ్లిషర్స్, ఏలూరు రోడ్డు, విజయవాడ-2)లో మొత్తం 175 కార్టూన్ లున్నాయి. లావొక్కింతయులేని ఈ పుస్తకం వెల 12 రూపాయలని చెబితే చాలా ఎక్కువే అనిపిస్తుంది గాని పేజీలు తిరగేసి చూస్తే మాత్రం తక్కువే అనిపిస్తుంది. నిజానికిది వెలలేని పుస్తకం. ఈ కార్టూనిస్తాన్ లో ప్రతి పేజీ, ప్రతి బొమ్మా అమూల్యమే. ఇంత మంచి బొమ్మలని రూపాయికి పది పేజీల లెక్కన ఇచ్చారంటే ఇది భలే మంచి చౌకబేరమని చెప్పక తప్పదు.