వెనక ఇంగ్లీషులో వచ్చిన ''బ్లోజమ్స్ ఇన్ ది డస్ట్'' చిత్రానికీ, బి.ఆర్. ఫిలింస్ వారి ''ధూల్ కా ఫూల్'' (ధూళిలో పూలు) చిత్రానికీ పేరులోనూ, కథావస్తువులోనూ మాత్రమే పోలికలున్నాయి. ప్రయోజనాత్మకమైన వస్తువును స్వీకరించాలనే విషయంలో ముఖ్ రామ్ శర్మ, బి.ఆర్. ఛోప్రా ఉభయులకూ కూడా శరత్ కున్నంత చిత్తశుద్ధి ఉంది. వారిద్దరూ ఉమ్మడిగా ఇంతవరకూ చిత్రించిన చిత్రాలన్నీ ఈ విషయాన్నే చాటుతున్నాయి. వారి లక్ష్యం 'సాధన' చిత్రంలో పరిపూర్ణంగా సిద్ధించింది. ఆ చిత్రాన్ని చూసి కొండంత ఆశతో రాకపోతే ఈ చిత్రం నిరుత్సాహపరచదు. చిత్త శుద్ధి ఉన్నంత మాత్రాన అందరూ 'సాధన' అంత గొప్ప చిత్రం నిర్మించలేరు. ఈ చిత్రానికి దర్శకుడు బి.ఆర్. ఛోప్రా కాదు, యశ్ ఛోప్రా.

వేంకటేశ్వర మాహాత్మ్యం వంటి భారీ పౌరాణిక చిత్రాన్ని నిర్మించటం సామాన్యుల వల్లనయేది కాదు. డబ్బూ, ఓపిక, సామర్థ్యం అన్నీ కావాలి. 'ఇవన్నీమాకున్నాయి, మేము సామాన్యులం కాము' అని నిరూపించారు ఈ చిత్ర నిర్మాత, దర్శకుడూ. చాలా రోజులుగా ఎదురుచూస్తూన్న అశేష ప్రజానీకం ఆశించిన దానికన్నా రవంత ఉన్నత ప్రమాణంలోనే ఉంది చిత్రం. పౌరాణిక చిత్రం నవ్వులపాలు కాకుండా తీసి మెప్పించటం ఎంత కష్టమో తెలిసినవారికి ఈ చిత్రం ఇంతకంటే చక్కగా నిర్మించడం తెలుగు సీమలో ఎవరికీ చేతకాదని తెలుస్తుంది. తెలుగు చిత్ర రంగంలో ఇన్నాళ్ళనుంచీ ఆనవాయితీగా వస్తున్న పౌరాణిక ధోరణిలోనే ఉన్నా, కథ అందరికీ సుపరిచితమే అయినా దాన్ని చెప్పడంలో దర్శకుడు చూపిన ప్రతిభవల్ల, చిత్రం ఎంత పొడుగువున్నా చూడక తప్పింది కాదు. చిత్రంలో పౌరాణిక కథ ముగిసిన తరువాత, స్వామివారి ఉత్సవాలు, ఊరేగింపులూ, తీర్థ ప్రజలు, స్వామి వారి పవ్వళింపుసేవ మున్నగునవి అన్నీ డాక్యుమెంటరీ లా చూపారు.

సంగీతం, నృత్యం, హాస్యం, ఉత్కంఠ, ప్రేమ, వియోగం అన్నీ తగుపాళ్లలో చక్కగా మేళవించి పండిత పామర జనాలందరి హృదయాలను అలరించగల గొప్ప చిత్రం నయా సంసార్ వారి 'చార్ దిల్ చార్ రాహే'. చెత్త చిత్రాలను చూసి చూసి బూజుపేరుకున్న హృదయాలను చిగురింపచేయగల చిత్రం యిది. చిత్రం అంతటా స్వచ్ఛమైన, స్వతంత్రమైన, సరిక్రొత్త వాతావరణం, సగటు సినిమాల అవధులను అతిక్రమించి, బాక్సాఫీసు సూత్రాలనబడే బంధనాలను త్రెంచుకుని హాయిగా స్వేచ్ఛగా విహంగంలా విహరించిన మనోజ్ఞమైన ఇతివృత్తం, కరుణరసభరితమైన ఉత్కంఠతను పోషించే గొప్ప కథ, అంతకంటే అద్భుతమైన కథనం.

తస్వీర్ స్తాన్ వారి 'చాంద్' లేఖ్ రాజ్ భాక్రీ దర్శకత్వంలో సినీమావాళీ కరుణరస భరితంగా శరత్ నవలల నమూనాలో సగటు చిత్రంగా రూపొందింది.

"మెజారిటీ ప్రజలను రంజింప చెయ్యటమే మా లక్ష్యం. డెమోక్రసీ లక్ష్యం కూడా ఇదేగా" అని ఈమధ్య ఒక ప్రముఖ చలనచిత్ర నిర్మాత అన్నారు. ప్రజా బాహుళ్యాన్ని రంజింపచెయ్యటమే చిత్రాల లక్ష్యవైుతే శ్రీప్రొడక్షన్సు వారి 'శాంతినివాసం' ప్రథమ శ్రేణి చిత్రాల కోవకు చెందుతుంది.

మార్స్ అండ్ మూవీస్ వారు అజిత్ చక్రవర్తి దర్శకత్వం క్రింద నిర్మించిన 'అర్ధాంగిని' చిత్రాన్ని ఆ సంస్థ స్థాపకుడు, ఉత్తమ దర్శకుడూ అయిన కీ.శే.అమీయ చక్రవర్తికి అంకితం చేశారు. ఈ చిత్రం అంతటికీ రెండే ఆకర్షణలు. ఒకటి: నటి - మీనాకుమారి, రెండు: సంగీత దర్శకుడు - వసంత దేశాయ్.

చలనచిత్ర కావ్య జగత్తులో శాంతారాంను కాళిదాసుగా వర్ణించవచ్చు. 30 సంవత్సరాల చలనచిత్ర చరిత్రలో కావ్యగౌరవం అందుకున్నవి బహుకొద్ది. వాటిలో రాజకమల్ కళామందిర్ సమర్పించిన ఒక్కొక్క చిత్రం ఒక్కొక్క మధుర కావ్యం. శాంతారాం నిర్మించిన ప్రతి చిత్రం, ప్రేక్షకుల ఆరాధనలందుకొని, వారి హృదయాల్లో శాశ్వత స్థానాన్ని సంపాదించుకుంది.