Title Picture

రేఖా చిత్రావారి 'ఖిలాడి' హిందీ చిత్రం అక్టోబరు 26వ తేదీన విడుదల అయింది. ఈ చిత్రంలో క్తతి యుద్ధాలూ, గుర్రపు స్వారీలూ, జెమినీ సర్కస్సూ ఉన్నాయి. నాయకుడుగా రంజన్ చక్కగా చేశాడు. అతను ఇందులో ఒకే పోలికలు కల ఇద్దరబ్బాయిల వేషాలు వేశాడు. నాయికగా జబీన్ నటించింది. నర్తకిగా నటించిన నూతన తార షకీలాబానో భోపాలీ...

Title Picture
సగటు విద్యాసంస్కారాలు గల తెలుగు ప్రేక్షకులను (అనగా మెజారిటీ ప్రజలను) మెప్పించడానికి, శతదినోత్సవాలు చేయించుకొనడానికి అవసరమైన బాక్సాఫీసు హంగు హంగామాలన్నింటినీ ఏర్చికూర్చి, రామకృష్టా ప్రొడక్షన్స్ వారు తయారు చేసిన భారీ (దాదాపు 16 వేల అడుగులు) చిత్రం 'టాక్సీరాముడు' ఎవరికీ ఆశాభంగం కలిగించదనే చెప్పవచ్చును.

Title Picture
ప్రసాద్ ఆర్టు పిక్చర్స్ వారి రజతోత్సవ చిత్రం 'ఇల్లరికం' ఆధారంగా ప్రసాద్ ప్రొడక్షన్సువారు నిర్మించిన 'ససురాల్' చిత్రం ఉత్తర హిందూస్థానంలో దిగ్విజయయాత్ర జరిపి, పెక్కు కేంద్రాలలో శత దినోత్సవాలు, రజతోత్సవాలు చేయించుకొని, ఈ నెల 13వ తేదీన ఆంధ్రదేశంలో విడుదల అయింది. 'ఇల్లరికం' చిత్రాన్ని చూసిన అశేష ప్రజానీకానికి ఈ చిత్రాన్ని గురించి వేరే చెప్పనక్కరలేదు. ఆ చిత్రానికి సరిగా నకలుగా ఉంది ఈ చిత్రం. రజతోత్సవ చిత్రమనే యోగ్యతాపత్రం చేతపట్టుకొని వచ్చింది కనుక ఇది వినోద ప్రధాన చిత్రం అవునా కాదా అని తటపటాయించవలసిన పని లేదు. బాక్సాఫీసు హంగులు ఎన్ని ఉంటే ఇంత విజయాన్ని సాధించగలిగిందో మనం అంచనా వేసుకో వచ్చు. ఈ చిత్రం ఆంధ్రదేశంలో ఇంత ఆలస్యంగా 'అడుగు పెట్టడానికి కారణం ఉంది. తెలుగు ప్రేక్షకులు 'ఇల్లరికం' చిత్రాన్ని ఎంత ఎక్కువగా మరచిపోతే అంత ఎక్కువగా ఈ చిత్రానికి డబ్బులు వస్తాయి.

Title Picture
షెర్లీ మెక్లేన్, డేవిడ్ నివెన్, కాంటిన్ ఫ్లాస్

చాలా కాలంగా ఎదురు చూస్తున్న 'ఎరౌండ్ ది వరల్డ్ ఇన్ 80 డేస్' చిత్రాన్ని జూల్స్ వెర్న్ రచించిన నవల ఆధారంగా మైఖేల్ టాడ్ నిర్మించాడు. మైఖేల్ ఆండర్సన్ దర్శకత్వం వహించాడు.

ఈ చిత్రానికి కథాస్థలం లండన్. కథాకాలం 1872. విమానాలు లేని ఆ రోజులలో ఒక పెద్ద మనిషి 80 రోజుల్లో భూప్రదక్షిణం చేసి వస్తానని మిత్రులతో 20 వేల పౌనులకు పందెం కాశాడు. ఒక విదూషకుడిని, ఒక చిన్న బస్తాడు నోట్ల కట్టలనీ వెంట తీసుకుని యాత్ర ప్రారంభించాడు. బెలూన్లు, బస్సులు, రైళ్ళు, ఓడలు, స్లెడ్జి బళ్ళు, గుర్రాలు, ఏనుగులు ఇత్యాది నానారకాల వాహనాలలో ప్రయాణం చేసి, అనేక ఆపదలకు గురియై చివరకు పందెం గెల్చుకుంటాడు. ఈలోగా అతనికి యాత్రలో ఒక ప్రేయసి తటస్థ పడుతుంది. ఈ భూప్రదక్షిణంలో వారు చూచిన వింతలనూ, ప్రకృతి దృశ్యాలనూ, అనుభవించిన కష్టాలనూ, చేసిన సాహసాలనూ చిత్రిస్తుంది ఈ చిత్రం.

Title Picture
'ఛాయా' చిత్రం ఎ.వి.యం. సంస్థ ఆర్జించుకొన్న పేరును నిలబెట్టగల విధంగా ఉంది. లోగడ ఎ.వి.యం. సంస్థకు విశేషంగా ధనం ఆర్జించి పెట్టిన చిత్రాల కోవకే చెందుతుంది ఈ చిత్రం కూడా. హృషీకేశ్ ముఖర్జీ పేరును చూసికాక ఎ.వి.ఎం. సంస్థ పేరును చూసి, ఈ చిత్రం స్థాయిని అంచనా వేసుకుని చూస్తే ఆశాభంగం కలగదు. తన అభిరుచులకు, సంప్రదాయాలకు స్వస్తి చెప్పి ఎ.వి.యం. వారి అభిరుచులకు అనుగుణంగా ఆయన ఈ చిత్రాన్ని తయారు చేశారు. ఈ చిత్ర నిర్మాణంతో ఆయన తన కీర్తిమకుటానికి కాక, ఎ.వి.యం. వారి కీర్తిమకుటానికి మరొక కొత్త ఈకను తగిలించారు. 'అనురాధ' మార్కు చిత్రాలనే కాక, ఎ.వి.యం. మార్కు చిత్రాలను కూడా తాను నిర్మించగల సమర్థుడనని ఆయన రుజువుచేసుకున్నాడు. అసలు ఆయన తీయగలిగినవి ఇటువంటి చిత్రాలేననీ, 'అనూరాధ' వంటి ఒకటి రెండు చిత్రాలను పొరపాటునో, గ్రహపాటునో నిర్మించారనీ ఈ చిత్రం వల్ల కొందరు అనుమానించే ప్రమాదం ఉన్నది.

Title Picture
నాగేశ్వరరావు, కృష్ణకుమారి
కవిత చిత్రవారి 'వాగ్దానం' చిత్రానికి శరత్ రచించిన 'వాగ్దత్త' కేవలం ఆధారం మాత్రమే. ఇది తెలుగు సినిమా కాబట్టి ఇందులో శరత్ కథ యథాతథంగా ఉండకూడదు. ఉండాలనీ, ఉంటుందనీ ఆశించడం పొరపాటు. ఈ దృష్ట్యా చూస్తే ఈ చిత్రం ఆశాభంగం కలిగించక పోవచ్చును.

Title Picture
'రాణీ చెన్నమ్మ'లో రాజకుమార్, బి.సరోజాదేవి

'అద్భుతం', 'అమోఘం' ఇత్యాది పదార్థాలు మారిపోతున్న ఈ కాలంలో పండితులు, పత్రికలు, ఈ చిత్రాలను అద్భుతం, అమోఘం అని వర్ణిస్తే ఆశ్చర్యం లేదు. ఎలా ఉన్నాయని నిగ్గదీసి అభిప్రాయం అడిగితే చెప్పడం కష్టం. అందుకే-అనిర్వచనీయంగా ఉన్నాయంటే సరిపోతుందేమో. ఇక ఈ చిత్రాల స్థాయిని గురించి ప్రశ్నిస్తే-నూటికి 90 తెలుగు డబ్బింగు చిత్రాలు ఏ స్థాయిలో ఉంటున్నాయో ఇవీ అలాగే ఉన్నాయని చెప్పక తప్పదు.

Title Picture
దేవానంద్, సాధన

పాపం పెచ్చుపెరిగి, ప్రళయం విరుచుకుపడబోతున్నప్పుడు ధర్మదేవత మూడు కాళ్ళు విరక్కొట్టుకొని నాలుగో పాదంపై అల్లాడుతున్నప్పుడు, ధర్మసంస్థాపనార్థం భగవంతుడు భూమిమీద అవతారాలు తాల్చినట్లే -డబ్బింగ్ చిత్రాల హోరు పరాకాష్ట నందుకొని ప్రేక్షకుల మనస్సులు కకావికలమై, తలలు పగిలిపోగల పరిస్థితి ఏర్పడినప్పుడు, సినీ ప్రపంచంలో కళాదేవత ఒంటికాలిపై అఘోరిస్తున్నప్పుడు, మలయమారుతంలా, పన్నీటిజల్లులా, వేణుగీతంలా సేదతీర్చి, హాయికూర్చి, ప్రేక్షకమనస్సులలో ఆశాభావాలను చిగురెత్తించడానికి ఏ నాలుగు నెలలకో అయిదు నెలలకో ఒకసారి కళాత్మకం, వినోదాత్మకం అయిన - 'హమ్ దోనో' వంటి - చిత్రాలు విడుదల అవుతూ ఉంటాయి. సకాలంలో ఇటువంటి చిత్రాలు వచ్చి ఆదుకొంటున్నందువల్లనే సినీమా పరిశ్రమ విద్యావంతుల కోపానలానికి, శాపానలానికి ఆహుతి కాకుండా పోతున్నదేమో.

Title Picture
కంట తడి పెట్టించగల చిత్రాలు

'జేబుదొంగ', 'కన్యకాపరమేశ్వరీ మహాత్మ్యం' (డబ్బింగు) చిత్రాలు రెండూ కొంచెం హెచ్చు తగ్గుగా ఒకే స్థాయిలో ఉన్నాయి. ఈ రెండు చిత్రాలూ కూడా ప్రేక్షక హృదయాలను కలచివేయగల విధంగా, ప్రేక్షకులలో తీవ్రమైన పశ్చాత్తాపాన్ని రేకెత్తించగల విధంగా రూపొందించబడ్డాయి. ఏ కారణాల వల్లనైతే నేమి ఈ చిత్రాలను చూస్తున్నంత సేపూ అన్ని వర్గాల ప్రేక్షకులు నవ్వుకొంటూ, దుఃఖిస్తూ, పశ్చాత్తాప పడుతూ, నిట్టూరుస్తూ ఉంటారు.

Title Picture

బాలల చలనచిత్ర సంఘం వారు 'గురుభక్తి', 'ఏకత' చిత్రాలను నిర్మించారు. వీటిలో 'ఏకత' చిత్రం నిడివి 2,875 అడుగులు. ప్రదర్శనకాలం 30 నిమిషాలు ఉంటుంది. ఐకమత్యాన్ని గురించి ప్రబోధించే చిత్రం ఇది. భారతదేశంలో పూర్వం రాజులు తమలో తాము కక్షలు పెంచుకోవడం వల్ల విదేశీశత్రువులు మన దేశం మీదికి దండెత్తి సర్వనాశనం చేశారనీ, అందరూ ఐకమత్యంతో మెలగితే ఏశక్తీ మనను ఎదిరించలేదనీ ఒక పాఠశాలలో ఉపాధ్యాయిని పిల్లలకు చెబుతున్నట్లుగా దీనిని చిత్రీకరించారు. దేశద్రోహి అంభి వల్ల పురుషోత్తముడు అలెగ్జాండర్ చేతుల్లో ఎలా ఓడిపోయాడో ఆమె ఉదాహరణగా చెబుతుంది.

Title Picture
అశోక్ కుమార్, నిషీ

శంకర్ మూవీస్ వారి 'డార్క్ స్ట్రీట్' హిందీ డిటెక్టివ్ చిత్రం. తెలుగులో ఈనాడు లారీల కొద్దీ ఉత్పత్తి అవుతూ, తెలుగు పాఠకుల, ప్రేక్షకుల ఆదరాభిమానాలకు గురి అవుతున్న డిటెక్టివ్ నవలలకు నకలుగా ఉంది ఈ చిత్రం. ఈ 'అపరాధపరిశోధన' తెలుగులో చలన చిత్రాలకు వ్యాపించకుండా, కేవలం సాహిత్యానికే పరిమితమై ఉండడం మన అదృష్టం. పాపం హిందీ, తమిళ రంగాలలో ఈ అపరాధ పరిశోధన... చలన చిత్రాలకూ, సాహిత్యానికీ కూడా పట్టింది.

Title Picture
పుష్పలత

ఇది స్టంటు చిత్రమని పేరు చూస్తేనే తెలిసిపోతుంది. అంత చక్కగా అతికేటట్లు పెట్టారు పేరు. ఈ చిత్రంలో ఇంకా స్టంటు చిత్రానికి కావలసిన సర్వలక్షణాలు ఉన్నాయి. స్టంటుకు అంతరాయం కల్పించని కథ, కథకు తగ్గ భాష అన్నీ చక్కగా అమరాయి. రీళ్ళ తరబడి కత్తి యుద్ధాలు, గుర్రపు స్వారీలు చేసి నటీనటులు అలసిపోగానే వారికి విశ్రాంతి కల్పించడంకోసం మధ్య మధ్య కథ వచ్చిపోతూ ఉంటుంది. ఈ కథలో మరొక విశేషం కూడా ఉంది. అది అవసరమైనప్పుడు జానపద చిత్ర వాతావరణంలోనికి, అక్కర్లేదనుకున్నప్పుడు సాంఘిక చిత్ర వాతావరణంలోనికి అంగలు వేస్తుంది. ఆయా సందర్భాలననుసరించి కత్తులు, గుర్రాలు, పిస్తోళ్ళు, జీప్ కార్లు కథలో ప్రవేశిస్తూ ఉంటాయి. నటులు కూడా కాసేపు జానపద వీరుల దుస్తులు, కాసేపు పాంట్లూ, జర్కిన్ లూ ధరిస్తారు.